بالهنا والقافية

استهلال
أكد الشاعر طارق المحياس أن خبر إقالته من قناة نجوم إشاعة أطلقها الشاعر راشد شرار, وصرح أن سبب خروجه من القناة هو الاستقالة، ووجه طارق المحياس رسالة قوية اللهجة لراشد شرار بأنه "كاذب" واتهمه بالغيرة منه، ومنا إلى الأخ راشد شرار وترى طارق المحياس يقول عنك كاذب وغيار "يعني بتاع قطع غيار" وانا أقول: صلوا على النبي يا شباب البرنامج في بداياته، أصبروا كم شهر وبعدين تهاوشوا، ليه بدري كذا لا تشمتون فيكم باقي القنوات، يحلفون أن جيرانكم في القناة اللي انتم خابرينهم ميتين ضحك، وخصوصا توهم مخلصين قضية ودافعين دم قلبهم عليها!

بيني وبيني ولا أعلم احد

أمسيه واعلام واضواء وصحافه
وانا لا وقفت ما بيني وبيني
محمد جارالله السهلي

أبو جار الله كلامك صحيح لأني أعرف واحد وقف بينه وبين نفسه جا ونش المرور سحب "نفسه"! وخلا "بينه" لأنه موقف "نفسه" كان غلط، فانتبه حبيبي لا يكون بينك الثانية موقفة في موقف الله لا يوقفنا فيه، وتصير الدعوى مخالفات وقضية ومحكمة، طيب سؤال لما أنت توقف بينك وبين نفسك وش تحس فيه؟ طيب لما تغمض وش تشوف؟ طيب ولما تفتح تشوف؟ والله إني ناصحك هذا آخرة مخاواتك لمدغم أبو شيبة! عموما جت سليمة إن شاء الله وسلمي لي عليك وعلى نفسك وقل لهم خلونا نشوفكم!

طبعا هي اللي كاتبته

كنت افوز واشتري موتر جديد
واخذ امي تشتري سوق القماش
ولاء عواد
ولاء يعني هذا الطموح؟ أنت تشترين موتر جديد وامك تشتري سوق القماش كله، طيب والناس تقعد من غير قماش؟ ما لكم نية تخلون شي لغيركم؟ ترى الصيف جاي وموسم عروس كيف الناس بتحضر عروس من غير أقمشة؟ أنا خبرت البنات يحبون الألماس! يحبون الشناط الماركة بس طموح سوق القماش هذا أحس إنه تجاري بحت! لا وواضح من مفردة "موتر" ما شاء الله انك تعبتي في كتابة البيت لأنه طبعا يتناسب مع كونك شاعرة وليس شاعر، ويتناسب أكثر مع لهجتك واللي مو مصدق بكيفه.

انشر الغسيل .. للمعلم شراحيل

ولو انها توقف على سطح الاهرام
جوها عصابات التحف واسرقوها
ماجد الخالدي

معلومة جديدة من شاعرنا ماجد الخالدي تنص على أن الأهرامات لها سطح وليس قمة، واللي يقول إن الأهرامات لها قمة مو سطح يروح يتفاهم مع ماجد، مع أنه لو قال على رأس الأهرام مشي الحال بالزحمة، ولكن لا وألف لا من حق الناس تعرف أن للأهرامات سطح، وكان الأخوان الفراعنة ينشرون غسيلهم عليه، وولدهم الكبير مسوي عليه ملحق والشعب كل ليلة مطيحين عنده يتابعون مباريات الدوري الفرعوني على وحده ونص، طيب انتبه من عصابات الشعر لا تسرق البيت منك!

الطيبون للطيبات

تبطي الحرامـية على ذمة حرامي
الحنش يلقى الحنش والعقربه للعقربه
محمد الدحيمي

أبو بدر أنت متأكد من هالكلام؟ يعني العقربة ما تاخذ عقرب؟ عقربة وعقربة.. هم بعد ماشين على الموضة، شوف هو فيه مشكلة في البيت، أما أن الحرامية تغيرها لحرامي عشان يصير عندنا عدد اثنين حرامي وعدد اثنين عقربة، ونعطي كل حرامي عقربه تلدغه ونخلص منه، أو انك تغير العقربة لعقرب وتخلي الثنتين حرامية، يعني لا تقعد كذا اضبط أمورك وانا اخوك.. طيب سؤال أخير: التيس مين ياخذ؟ طيب بعد ما العقارب تذبح الحرامية مين بيذبح العقارب؟ طيب اسمع لا تسكت على نفسك وما تاكلش لا سمك ولا بيض وان شاء الله بتصير أحسن!