استهلال
"صرح الشاعر الشاب فيصل اليامي بأنه عرض عليه مبلغ مليون ريال من قبل إحدى الشخصيات البارزة مقابل خروجه من مسابقة شاعر المليون"، التصريح هذا فيه غلط، لأن فيصل اليامي و"شاب" ما تركب! دفعة جدي كيف شاب؟ إذا من البداية بطل التصريح! لا تزعل يا بو نوف بطل التصريح يعني التصريح صار بطل وفاز زي الاتحاد، بعدين يا فيصل مين هذا اللي يكرهك لدرجة إنه ما يبي يشوفك على التلفزيون وعنده استعداد يدفع لك مليون ريال بس يفتك من شوفتك؟ طبعا واضح إن الرجل هذا سعودي لأن الخبر قال مليون ريال مو مليون درهم، وش رايك بالتدقيق أنفع كولمبو؟
أبو تمام
والأغنية حسب اعتقــادي .. باعتذر
عن كل شي إلا الهوى .. أيوه تمام
أحمد المطيري
أما "أيوه تمام" هذه هي اللي زادت البيت حلا، بس الله يهديه محمد عبده لو إنه أضافها على الأغنية كان صارت الأغنية بعد تمام، أبو خالد وربي "أيوه تمام" هذي خلتني أحس إنك قاعد توجه اثنين هنود يركبون ثلاجة في غرفة ظلام، وأنت تقول لهم "يمين شوي.. يسار شوي.. فوق شوي أيوه أيوه أيوه أيوه تماااااااام! إنته تمام يا أسطى، بس عيبك أنك زعول، وإذا زعلت تتصل وتقعد تهاوش وصوتك في أحسن حالته خشن، فما بالك إذا ما كنت تمام؟ صوتك ما يطلع تمام!
شابشوكي أقدع ناس
الما.. رقا ودنّـق لفمْـك وشربكي
وكل ما ظما الما جا لفمّـك ولا راح
عبد الله الراشد
"شربكي" هذي أشك إنها تقرب لعائلة شابشوكي العريقة، والشرب فعل قد يكون مسموح وقد يكون ممنوع، أما "الكي" فهي مفردة أثيوبية تعني مفتاح الله يفتح لك الدنيا بوجهك يا شاعرنا الرائع، أما الشطر الثاني فاستخدمه شاعرنا العبقري ليدلل على أن فمها مرسوم كالعنقود... ضحكتها أنغامٌ وورود !
صدقني لو أنت قاري البيت مرتين ثلاثة كان ما كتبته، وان كتبته ما نشرته، وان نشرته ما نشرته باسمك، كان لفقته باسم واحد ثاني!
خرافات خزعبلات خرافات
نعيق الغراب ينبئ بواقعٍ مشؤوم
خرافات مثل الغول والداب والحيّـه
محمد ابن الذيب
يابن الذيب الداب والحيه خرافات؟ أنت متأكد أنهما خرافات؟ طيب أنت واثق من هالخبرية والا سامع عنها بس؟ ماكنت أعرف إن كل هالثعابين اللي نشوفها بالصحاري والتلفزيون وحدائق الحيوانات خرافات وخدع سينمائية، سؤال يا بو راشد بما أنك خبيرنا في الأمور "الثعباناتية"، وش الفرق بين الداب والحية؟ طيب أيهما يعض وأيهما يسولف معك؟ وعلى فكرة مبروك العمارة وعقبال اليخت إن شاء الله بس عطنا فرَّة لا تنسانا!
اقعدوا ببيوتكم أصرف لكم
انتي لو مالك مكانه ما أجيك
وانا لو مالي مكانه ماتجين
سعد الشعلاني
والأماكن كلها مشتاقة لك.. الحمد لله يا سعد انك كتبت البيت هذا للبشرية، لأنك خدمتنا في تفسير ظاهرة مهمة ألا وهي أن كل إنسان ما يجي للثاني إلا إذا كان له مكانة، وإذا ما كان له مكانه فبيقعد في بيتهم أصرف له، لذا نشكرك جدا يا سعد، بس إذا ما جا لك ولا جيت له وين بتروحون؟ طيب مرونا تقهووا عندنا الليلة، لأنك أنت وياه غالين عندنا، ولكم مكانة نبيكم تتبؤونها عندنا!