بالهنا والقافية

استهلال
فيصل الخالد
تعجبني المجلات المضروبة لما تتهور وتعتقد أنها بتنافس المجلات العريقة وبتلعب مع الكبار وتبدأ تطلق تصاريح نارية أكبر من حجمها بكثير ... ومن هذه المجلات الله يستر علينا وعليها مجلة جديدة نزلت عددين فقط خلال ثمانية شهور يعني ثمانية شهور على ما الله قدرهم ونزلوا عددين .. وفجأة في العدد الثالث اللي نزل في الشهر التاسع ولأنه نزل بعد شهر واحد فقط من السابق تهور مدير التحرير وصرح في مقدمة العدد "نعد قراءنا ومتابعينا الأفاضل أن نلتزم بالوقت وأن يكون لنا عدد بداية كل شهر " وبعدها أبو الشباب غاب أربعة شهور لا حس ولا خبر والحين يقولون عارضها للبيع".
[email protected]

مين يقدر يحاسبه؟
من افتح يا سمسم وإلى فيلم أبو كرتون
أمورٍ تغث كبود حتى الوراعيني
سلطان الهاجري
مشكلة الشعراء الكبار مشكلة عويصة جدا... يعتقدون أنهم وصلوا لمرحلة ما أحد له الحق انه يدقق عليهم ولا يحاسبهم لو يكتبون وش يكتبون... ومن هالمنطلق قرر سلطان يسمي "أفلام الكرتون" "أفلام أبو كرتون" عشان يمشي البيت معه والتهور الأكبر أنه يقول وهو مفتخر إنه متابع جيد لبرنامج افتح يا سمسم... سلطان بالذمة من يعجبك أكثر ميسون وإلا نعمان؟ عموما أنا أعرف واحد من الشعراء يتابع عدنان أبو لينا وواحدا آخر ما تفوته حلقة من حلقات المسلسل الشهير طاش ابو طاش.

خذ راحتك ماحد حولك
أنا مكركب وكركبتي
نادر العماني
كركب حبيبي كركب ليه ما تكركب ولا تخاف والله ماحد درى عنك ولا احد درى عن كركبتك... بعدين عادي لو دروا الناس يعني فيما لو دروا الناس تدري وش بيقولون... شاعر تكركبت الدنيا معاه وقرر انه يتكركب مع كركبته لأنها معروفة وأنا أخوك الكركبة اللي تعرفها أفضل بكثير من الكركبة اللي ما تعرفها... يا نادر اتقي الله يا رجل جبت لنا الكلام!

يمن البس شمال البس
الله عطى السودة اللي ما عطى جده
والله عطى جده اللي ما عطى السودة
مطلق بن شويه
هذا آخرة التقليد الأعمى يا مطلق.. أنت تفكر حامد يزيد يسويها كذا؟ اقلب البيت وحرك مفردة يمين ورجعها ويجي صح وإلا وش وضعك يارجل؟ والله يا بيتك هذا ذكرني بثياب الإخوة السودانيين يمين البس شمال البس وين ما تقلبه ينلبس ما فيه أي مشكلة بعدين طبيعي جدا أن السودة غير عن جده ولو إنهم متشابهات بكل شي كان اسم جده السودة مكرر واسم السودة جده مكرر وتعال حلها عاد يبي لك فيها هذه دور ثاني ودرجات رحمة ويالله تنجح.

اشرب كازوزا أنا
موكا فربتشينو وعجل علي
مشغول مع سواليف الغرام
ناصر بن دهيم

طيب لا تنفخ.. وبعدين مشغول بايش يا ناصر بورصة نيويورك توها ما فتحت وبورصة طوكيو قالوا لك فكنا ما عاد نبيك تساهم لأنك تؤثر في سعر الين بطريقة مباشرة ومخيفة.. يعني على هونك وأمر الله من سعة ليه مستعجل... تدري يا ناصر بيتك هذا ذكرني بمثل هندي شهير كان يردده غاندي أثناء نضاله ضد الناموس ويقول "ماشربشي الشاي اشرب كازوزا أنا ماشربشي الشاي".