بالهنا والقافية
استهلال
الحمد لله الذي بلغنا الشهر الفضيل وأعاننا الله وإياكم على صيامه وقيامه.. وأعاده علينا وعليكم وعلى سائر المسلمين ونحن بأفضل الأحوال.. نفسي يا نفسي أوصيك يا نفسي وأذكرك بأن الناس ما لها ذنب إنك صايمة وما شربتي دلة قهوة قبل الدوام فاحتسبي الأجر يا نفسي.. والناس ما لها ذنب إنك جوعانة أو عطشانة أو فيك نوم.. فاحتسبي الأجر يا نفسي والابتسامة في وجيه الملسملين إن شاء الله إنها صدقه.. فاحتسبي الأجر.. شهر غفران وشهر رحمة لابد للإنسان أن يحاول أن يقلع عن بعض أخطائه وذنوبه عل الله أن يغفر لنا ولوالدينا ولسائر المسلمين ويرحم موتانا وموتى الملسملين .. رحمك الله يا أبو خالد عسى مثواك الجنة.. وعسى ربي يقدرنا نكمل بعدك المشوار.. رحمك الله يا أبو خالد.. رحمك الله يا أبو خالد.. رحمك الله يا أبو خالد.. وكل عام وأنتم بخير.
طقطقة ضلوع
ذبحني بكثر ما أشتاقه ذبحني بكثرة أشغاله
شغلني جنن قلبي فصلني من على الخدمة
يا ليتني ساعة ٍ بيده أو أرقام ٍ بجواله
يطقطقني على كيفه ولا أحفظ سوى رقمه
نهى نبيل
يا نهى الله يصلحك بس قولي آمين.. ترى تعبنا واحنا نحاول نلاقي لك الأعذار وترى أنا الوحيد اللي كنت رافض أطلق عليك "مذيعة الورعان" زي غيري وقاومت هذا اللقب لفترة طويلة يعني من باب الاحترام بس التسيب اللي قاعد يصير ما ترك لأحد مجال يغض النظر.. يطقطق مين يا نهى؟.. افرضي انه طلع متهور وخذ مفردة "يطقطق " ونسى الآلة الحاسبة والأرقام والخدمة وعلبة الهندسة والكلام العنيف اللي ذاكرته انتي في البيتين العظيمين وقام يطقطق بحرية شوي واخذ راحته بالطقطقة وكانت الأداة المستخدمة هي العقال وبالأردني "العكال " وطقطق لك ضلوعك يا نهى وش نسوي ؟ برامج الأطفال وش تسوي من بعدك؟ الإعلام بحاجتك أرجوك حاولي تنتبهي على نفسك شوي.
انتخبوا أم علي
ينجح جرير ويسقط المتنبي
الرب واحد والقلوب خليه
فالح الهاجري
يعيش جرير يا عيش جرير يا عيش.. بس يا شباب خلونا نركز بالانتخابات اللي مسويها فالح الهاجري.. طيب هل للمتنبي دور ثاني؟ وإلا جايب العيد ومتنيل على عينه وراسب بست مواد؟ مع انه الله يهديه لو ذاكر وشد حيله وترك لعب الكورة مع الأخطل وأبي تمام ما كان سقط بس هذه نهاية اللي ما يسمع كلام أبوه ومسكين أبوه رجال كبير يكد على حصان ويحتاج المساعدة.. طيب يا فالح هذه انتخابات بلديه والا إقليميه والا قروية والا شعرية والا إيش بالضبط؟ عشان الواحد يعرف يأخذ راحته بالهتافات والشعارات.
اسمع الكلام
وأثرك خذيت من الذهب بس لمعه
وأنا اللي واقف وسط الأشواق حافي
سعد الجميري
كم مرة يا سعد كم مرة بس علمني كم مرة نقول لك ياخي لا تطلع من بيتكم حافي وتسوي لنفسك مشاكل وتسوي لنا احراجات ما لها داعي.. ياخي والله العظيم إنا نخاف عليك يا سعد تراك أخ وعزيز وغالي وزميل من أيام جمعية الشعر الشعبي في البحرين وأنا أخاف عليك من المسامير والقزاز اللي بالشارع يا سعد.. بعدين انت رجال تطلع في القنوات الفضائية يعني كل ما جابوا لك قصيدة بالتلفزيون بتقول الناس شوفوا شوفوا هذا اللي يطلع من بيتهم حافي.. يعني ما هي حلوة بحقك حاول تتصرف تكفى وفي أقصى وقت ومر مجمع السيف واستفيد من العروض الرمضانية.
طيب والمطلوب
عـودت أعــزم وأروّح للشريطية
واخـذ ونيتيـن والتقسيـط بأثمانه
والورع وأمه يبون أشياء ضرورية
والراتب أقساط مـن راسـه لكرعانـه
ضاوي العصيمي
طيب والمطلوب يا ضاوي؟ شغل التلميح هذا أبدا ما ينفع بالساحة الشعبية الواحد لازم يكون صريح ويجيب من الآخر.. وبعدين أنت رايح رايح للشريطية ليه تاخذ ونيتين؟ ما يكفي ترى الآن رمضان ورمضان يحتاج مقاضي كثيرة والتزامات من هنا لهناك ولا تنسى السمبوسك والفيمتو وهذول من أهم ركائز "الأشياء الضرورية" بتاعة سعادتك.. واحنا من واجبنا عليك كإخوانك إن نقنعك خذ لك مرسيدس بدال الونيت وبيعه علي بربع السعر وبعدين سدد ديونك براحتك.. وإذا بعت المرسيدس وما مشى الحال خذ لك بنتلي واهديني إياه وتفاهم عاد انت مع الشريطية والأشياء الضرورية وكل عائلة اييييييه.