بالهناء والقافية

استهلال
وانتوا الواحد ما يغيب عنكم شوي ولا يا خذ أجازه إلا يلاقي الدنيا محيوسة في غيابه؟ من الطفل المهجن اللي جايبنه الأسبوع اللي فات ومورثينه زاويتي وماخذ راحته حش باسم شايب حداثي؟ وبعدين ممشوق الخشة هذا من أي مصحة مستوردينه؟ ما أقول إلا:
بلشنا الله في ناس ٍ تبيع وتشتري خلان
اجل من بعد فصولي يجينا شايب ٍ مضروب
أنا وأسلوبي المبدع قهرنا شلة الخبلان
وسيم وطلتي حلوه رزين وعاقل ومحبوب
اشك اللي مرتبها يسمونه أبو كنعان
بامشيها على كيفي عساه يجن وإلا يتوب

ابنننننننق وخل الزملقة عنك

الصدر ممطور والزملوق زملوقي
وزرايره لو شكت مانيب بانقها
زايد بن كروز
تكفى ابنق.. طلبناك تبنق.. ياخي ابنق وخلصنا... تصدق إني كنت اعرف واحد زملوق يوم الله عافاه وخلصت زملقته ندم لأنه كان يحس انه أفضل وهو زملوق من لما صار مش زملوق... طيب تعرف تقول زملوقنا غلب زملوقكم يقدر زملوقكم يغلب زملوقنا زي ما زملوقنا غلب زملوقكم؟. تتوقع الأخ المبنوق يعرف عن الأخ الزملوق؟ والله لو إني فاهم وش معنات زملوق ومبنوق كان اشتريت طابوق عشان جمال القافية بس بما أني ما أعرف إغريقي مضطر انهي المكالمة قبل لا أجيب العيد قبل موسمه وأتحدى أي قارئ يثرا عالنقطه مرتين ما تطب لوزه ويعوره رأسه.

ما يبي يرد
مفتوح ومسكر مسكر ومفتوح
تشوف رقمي وكن منت بتشوفه
عبد الله علوش
"كن منت بتشوفه " الله على قوة التركيب الله.. تحس الجملة الشعرية هذه يبي لها خارطة طريق عشان تقراها.. من جد شعرت أنها علبة بيبسي مفتوحة من أسبوع ولا انشربت وبعدين يا بوجابر ما تحس انك لزقت لأهله الله لا يهينك ما يبي يرد ياخي.. مرة يعطيك مشغول ومره ما يرد يعني افهمها.. تدري وش ميزة إن الواحد يحط لك بيت أنت وسعد بنفس الزواية؟ انتوا ما شاء الله عليكم نسخه في الشبه شيل السكسوكة تلاقي سعد حط السكسوكة عبد الله خفف الشنب محمد ثقل الشنب علوش يعني عائله مريحة جدا مع مراعاة فارق التوقيت.

منذ مبطي يا صديقي منذ مبطي
من قبل لا أسوي مشاكل مع الناس
عندي مع نفسي مشاكل كثيرة
سعد علوش
كل آل علوش خياله... عليهم رزة الراية.. يا زين سعد بينهم.. بو جابر اس 2 ما قدرت إني أجيب أخوك وما تشرفنا أنت معاه.. تصدق ودي اخلي البيت زي ما هو من غير تعليق لأنه معلق على نفسه.. مشاكلك مع نفسك أهم شي لا توصلك لمحاكم وتروح للقاضي وتقول يا سيادة القاضي بالأصالة عن نفسي ونيابة عني ارفع قضيه على نفسي لأني تسلفت مني وماني راضي ارجع لنفسي شي ولذلك أطالبك إن تسجني انتقاما لنفسي ودقي يامزيكة.. قضية إن شاء الله كسبانة كسبانة والميزة في هالقضية إن مهما كانت النتايج أنت الخسران.

وش ناويه تهز بعد
تهز يدها كل ما هزها الفن
وتهتز كل الخلق من هز يدها
لولا مخافتها من الناس تنجن
ما تكتفي بهز يدها وحدها
ناصر السبيعي
الله يهديك يا أبو الإعلام كله قول آمين هذا وأنت من رواد الإعلام الحديث وأبونا الذي علمنا الكورة.. البيت هذا اشك انه مكتوب في مصر وبالتحديد في احد الشوارع المشهورة جدا اللي ماني قايل اسمه بس يكثر فيه الهز يعني تقدر تقول كلن حاط جواله هزاززززززززززز وكله شغال هز واكل وز.. يخرب بيتها دينصور مو حبيبه هذه الي تهز يدها وتهتز كل الخلق مع يدها هذه لو تهز رجلها وش بيصير بالكرة الارضيه الله يكفينا الشر ومبروك يا ناصر أبشرك انك انضميت لقائمة مشاهير الساحة بسبب بالهنا والقافية.. لا تحزن ترى قبل فهد عافت ومساعد الرشيدي بس باقي كمن واحد من دفعة ما قبل النفط.