بالهناء والقافية
استهلال
سئل طارق المحياس في لقاء عن رأيه في برنامج شاعر المليون فكان اكبر انتقاد له على البرنامج عن المقدمين روضة ومحمد الهاشمي وقال انهم دون المستوى ولا يعرفون يتكلمون أساسا.. يعني يا لجنة ويا قائمين على البرنامج حسوا فيني وجيبوني اقدم البرنامج عنهم.. ويعني يا لجنة شوفوا إني نجحت في برنامج الكاميرا الخفية في رمضان ونجحت في تقديم برامج أخرى وينكم عني الله يهديكم بس.. ودك يسمعون كلامك ويغيرونهم بس يجيبون واحد غيرك عناد وقتها بتكون رفعة ضغط من قلب.
كل كل ونص نص
من حضن هذا الجفاف وغفلة ايديني
احتاجلك تاخذني من عذاباتي
يا كل كل القلوب الي توديني
لاجمل صباح زرعته في حكاياتي
عاطف الحربي
طيب بنمشي يا عاطف سالفة الزراعة والفلاحة الي في حكايتك ونعتبرها هواية متهورة ما راح تتكرر ولكن تعال نتفاهم على موضوع تكرار "كل كل".. هل أنت مقتنع بأنه كان تكرارا موفقا؟ طيب أجل شوف لك محامي جيد يحبك لك الموضوع لأن الدعوة بيكون فيها مخالفة التكرار ومخالفة التكرار هذه ماهي سهلة ولها عواقب وخيمة.. اما بالنسبة لما ورد في باب "عذاباتي" فاعتقد أن سيبويه يبلغك التحية ويقول لك يا عاطف إنه متذمر كثيرا ويردد بص شوف عاطف بيعمل إيه بص شوف عاطف بيعمل إيه.
سفل فيها وفي اهلها
اعمى ويطلب منظرة أخرس يبيهم يفهمون
واطرش حسبها اغنيه يقول مسمع علها
سمرا ودايم تكحل اتبغى الحمايل يخطبون
شينه ولا ينفعها... فيها القباحة كلها
عبدالله حمير
بل بل بل الله لا يقطنا بلسانك يابو نواف مسحت في البنت البلاط.. هذا انتو يالشعراء الشعبين اذا حبيتوا البنت حطيتوها ملكة جمال البجع وخليتونا نشك أنها مشاركه في "ميس يونيفيرس" وأنها ملاك ما ينقصها شي أبد.. وإذا كرهتوها سفلتوا فيها الأرض وخليتوها شينة وما ينفع فيها حتى الكحل والكحل من ابسط حقوق المرأة.. بعدين مين قال لك السمر لما يتكحلون يبون ينخطبون؟ الكلام هذا غلط ومردود عليك وما انصحك تزعل السمر لأن زعلتهم غامقققققه حبتين.
يو سبيك لندن؟
وياصاحبي واغلا اصاحيبي يا نايف ويت ويت
علم رشايدة الكويت الطيب منهم منهله
محمد ابن الذيب
والنعم فيك وفي نايف الرشيدي والرشايدة كلهم بس مو هذا موضوعنا يابو راشد.. موضوعنا هو "ويت ويت" بصراحة ابهرتنا يا رجل أبهرتنا وملحتنا وخللتنا يعني باقي لنا تكة ليمون ونصير أحلى سلطة بحرية.. ما شاء الله نفع معك لندن ما شاء الله عساني ماحسدك.. اجل ويت ويت.. صار لك سنة تحفر بلندن واخرتها طلعت بويت ويت.. اصاحيبي هذه جمع والا مفرد يابوراشد؟ تقرب لاصحابي شي؟ استفسار بريء جدا.. أقول عاش مضبط اموره وعقبال ما تروح فرنسا وتتعلم سنغالي قول آمين.
عود وتنقصه درنقه
ليت صبري في القطاعه مثل صبرك
كان عادي لا بادق ولا باعاتب
بس مشفوح ٍ على صوتك وخبرك
شفحة مطفر على يوم الرواتب
محمد الشهري
اقول بو عمر... بسك تلميح يابو الشباب والله كريم.. هلكتنا يابو الشباب يوم قصيدة عن الأسهم ويوم قصيدة عن الرواتب ويوم صور استعطاف ويوم تسوي نفسك أحول عشان تكسر خاطر الساحة وانت عيونك ما شاء الله تبارك الله ما فيها شي اللي يشوفك تسوي كل هذا ما يقول إنك صديق الرجل الشهم الكريم فيصل الخالد.. تدلل قول وش تطلب تحت أمرك حبيبي تمون.. حلالك كل ما أملك خذ عيوني وماهو كافي.. يعني بالعربي الثقل صنعة وخل عنك الحركات الي ما تناسبك ترى العذوبة أحلى بكثير عليك وبعدين بما ننا نتكلم عن الأحلى حاول تزيد النشا شوي بمرزامك ما الله عطاك من سالم صليم ياخي نص شماغه نشا والنص الثاني مرزام.