بالهناء والقافية

استهلال

تابعت مقاطع من حلقة الشاعر الخلوووووووووووووووووق جدا هلال المطيري من برنامج شاعر المليون وفعلا ابهرني شاعرنا الخلوق بتمالك اعصابه يوم مزحوا معاه أعضاء اللجنة وقالوا له أبياتك مكسورة وحاولوا يستفزونه بقدر المستطاع ولكن أثبت فعلا هذا الرجل الخلوق سعة صدره وغير المستغربة وأثبتت اللجنة خفة دمها من خلال هذا الموقف وهذه شهادة حق وإذا يا هلال أو يالجنة تبون هالشهادة مصدقة حاضرين للطيبين صحيح انكم بتكلفوني تصديق الغرفة التجارية ب 20 ريال بس ماهي خسارة تستاهلون اذا تبونها مترجمة لجميع اللغات ادفعوا انتوا الله لا يهينكم لأن الترجمة مكلفه حبتين .

مين عزم ولزم وطلق بال3 على الأخ ؟

والله لا يرحم ظروف الوقت والشدة
والجامعة والعمل والبعد واشغالي
خميس العازمي
أقول يا بيل قيتس مين عزمك وحلف عليك ولزم الا انك تمرعليه يا خميس ؟ طيب خلاص مرنا يوم الخميس يا خميس وبعدين تكفى المرة القادمة اذكر التخصص والكلية والمعدل التراكمي وكم مادة حرمان عشان الواحد يكون على بينة لو سمحت... متى التخرج طيب؟ وهل يوجد نية ماجيستير لدى الشاعر؟ جمهورك لهم عليك حق ومن حقه يعرف... زروف الوقت والشدة أتوقع أنها تقرب طبعا لجدة أم الرخا والشدة من جهة الاددددددددددده.

كيلو اللحمة بـ5 يا معلم

يكفي جروح ويكفي اللي غدالي
وتشبعني الوحدة ولو لحمها ني
أكتب من جروحي وشّي جرالي
والناس تستمتع ولا همها شي
بدر البتال
والله انت يابدر ما خليت فيها لا وحدة ولا هلال ولا نصر ولا اتفاق .. بعدين دام الوحدة الله يهديها لحمها ني ليه ما تقول للافندي الطباخ المحترم يخلي الوحدة تستوي شوي؟ وتأكد وانا اخوك إنها مبهرة كويس عشان كل الجراثيم اللي في لحمة الوحده تموت أخاف على معدتك من الأمراض المزمنة وغير المزمنة لأنه ثبت علميا وبدليل قاطع أن اللحمة النية إذا إنها ماهي مبهرة كويس تجيب مشاكل معدة... عموما لا تضيق خلقك شوف إذا صارت الوحدة مستوية أنا متاكد أن الناس بتبدأ تستمع وتهتم والله يوفق يارب.

بسكوت مالح والا حالي ؟

أتذكرك واطيح واقوم بسكوت
اخاف يشعر بي الملل وانجرف له
ذنبي أحبك موت يا طفتلي موت
وانتي ترى ذنبك بالاحساس طفلة
أحمد العبدالله
والله يابو حيمد يا فيه طيحات إن طحتها أنك ما تقوم بسكوت ولا تقوم مارس ولا سنكرس تقوم تقحص من الألم خل عنك بس.. وبعدين حرام عليك تارك بنات خلق الله وتلاحق أطفال ترى في أمريكا هذه فيها سجن بمجرد التصريح بس فمابالك انت تاخذ وتعطي بالموضوع؟ لو سمحت كل واحد يحب اللي على قده وخل الأطفال وحب الأطفال للاطفال والعب انت مع الكبار يا كبير.. وش رايك فيني بس وانا أمدحك وانا ما أعرفك أجل لو عرفتك وش باسوي باحط صورتك جنب صورتي بالزواية وباعتبرك قاط معاي او راعي رسمي.. ابسط يا وحش.

تخفيضات حرف الشين
سريتها كذا كذا ماهيب تاخذني انتعاش
في وادي مصعب مساريه وريضانه حشيش
وانا البليش من الخفاق والا يا بلاش
لبيش يا لبيش الا يالبا كل ابيش
عبيان اليامي
عبيان يا عبيان كثير حرف الشين عندك ياخي ما كنه مكلفك شي والا أنا غلطان.. يرحم والديك خلي لنا شوي شين لانك كذا بتجبرنا نكتب كل شي بحرف السين بسبب نفاد حرف الشين.. مايجوز هالكلام لا تورط مستخدمي اللغة العربية تكفى.. بعدين تراني صديق مقرب لفيصل اليامي ولمحمد عويضة ووالنعم فيك وفيهم ولكن تراهم ما يستخدمون حرف الشين باسراف كذا ويفكرون في غيرهم لما يستخدمونه انت ليه كذا أناني ما تبي غيرك في الساحة يتسمتع بهذا الحرف الجميل؟ تدري اني أحبك طبعا.