"حلمنتيشي السودان" ينتشر عبر البلوتوث بـ"هندسة"

وسط زحام الشعري الذي نعيشه الآن سواء في المجتمع الخليجي أو العربي، تتوهج مدارس وتخفت أخرى، وليس بالضرورة أن تكون الجودة خلف هذا الوهج، فهناك كلمة مسموعة للضحك لدى العالم، يستجيبون إليها مع كل نكتة، تعليق، عنوان صحفي وقصيدة أيضا!
وأخيراً تناقل كثير من الناس عبر تقنية البلوتوث في أجهزة الجوال، مقطعاً صوتياً ينقل ما يقال أمام ميكروفون وخلفه، حيث كان الطرف الأول شاعر سوداني خفيف الدم يدعى "أبو بكر محمد الحاج"، يشكي للطرف الآخر وهم الجمهور في أمسية "تجلجل" كل من فيها بشعر "حلمنتيشي"، وهو الذي يغيب ويحضر منذ العصر المملوكي، متميزاً –إلى جانب الضحك- بالمزج بين المفردات الفصيحة والعامية، ولا يأخذ هذا النوع من الشعر قيمة أدبية عالية، ويرجع البعض سبب ذلك إلى ولادته في عصر انخفضت فيه قيمة الأدب واللغة، لذا هو يجد رفضاً كبيراً من قبل بعض الأدباء والمثقفين، ويعتبرونه دخيلاً على الشعر خاصة والأدب عامة، لما يحتويه أحياناً من ألفاظ سوقيّة و"عربدة" كلامية.
على كل حال، استطاع أبو بكر محمد الحاج أن يكون عنصر الإضحاك المشترك في كثير من الجوالات، متغزلاً بحبيبته "هندسة"، التي لا نعلم ما إذا كانت ضحكت أيضاً مما كتب فيها أم أن النتيجة آلت إلى غيرك! إليكم بعض ما قاله هذا الحاج الحلمنتيشي.

انا راسى جاط
ما بين هواك والدبرسه
ألفت عشرين ألف بيت
سبعين قصيده مؤسسه
شان مره ألفت انتباهه
ومره اقدر احسسه

يا حلوه يا بت هندسه

يا حله يا زينة البنات
يا نجمة الليل و المسه
أنا رغم أشكال الشتات
حاضن عواطفك وحارسه
أنا في هواكي بقيت فتات
ودخلت عشرين مدرسه
جنيت مع كلمات هواك
بى قلبي قاعد اتنفسه

يا حلوه يا بت هندسه
كان شفتي يا بت هندسه........

خطواتي دايماً بالغلط
واموري ديما معكسه
يوم داك مساهر في الهدوم
وكويتا جت شان البسه
لقيته الصباح حقات اخوي
وهدومي قاعده مكرفسه!
كان للهدوم ما مشكله
بشوف لي مصيبتا البسه
لكن هواك اعملو ايه
دش دش عضامي وهرسه
داير لي فرصه أكون قريب
طبلة قليبك افلسه
عشان تشوفي هواكي كيف
بهدل عواطفي ودعفسه
كلماتي ليك اتبشتنت
ما زى زمان متهندسه
حتى الشعر الكان زمان
كلماتوا حلوه مملسه
هسي اتلخم بقى كيف كده
مافيهو كلمه مهندسه
إنتى السبب في كل دا
يا أحلى أسباب الأسه

يا حلوه يا بت هندسه

أنا ياخ بريدك اعمل ايه
وريني يا بت هندسه
امشى وأكورك في الزلط
يا ناس بريد بت هندسه
كم مره قلت أقوم براي
واقد معاها واحدسه
لكني ما بقدر عديل
مابقدر انضم اونسه
خليك من اشرح ليها حالي
وحبي ليك والدبرسه
يا هنايه داير اقوليك كلام
أصلو السكوت فيهو وسوسه
أنا يا ملاك أنا بعشقك
وما اظن بلاك ارجا المسه
دايريك تكوني لي حبيبه
وابقى ليكي حبيب قسه
اكسيك هواي وتلبسيني
نعيم هواك اجمل كسه
ويا ربي كل عاشق نبيل
تديهو زي بت هندسه
وترعاها من عين الحسود
ومن توب جمالك لبسه
ويا ربي تحفظا لي براي
ويا ربي تحفظا تحرسه