وأنا داري؟
.. ويستمر "المجنون أبو دفتر" سلطان الغنامي بتقديم الشعر للشارع، بعيدا عن الجلسات المخملية، يقدم الموقف كما هو بلا تجميل، من قلب شاعر يحس بما حوله أكثر من الآخرين، كشأن الشعراء الحقيقيين!
يقول سلطان: "عيال حارتي - وطني – يغضبون ويملون من تكراري لهمهم، أقرأ لهم صفحة بالمحكي كل يوم جمعة.. منهم من أضطر إلى مخاطبته بالإشارة أحيانا! ومع ذلك يحس ويشعر، ويعبر بنظرات قد تبكي من يشاهدها، كلهم معي في حب هذا البلد وأهله الطيبين البسطاء، كلهم يؤمنون أن من حبك لوطنك أن تبحث وتفتش عما يؤرقه ويثقل كاهله"
اقرأوا هذه الجملة جيدا "الشاعر العظيم هو الإنسان العظيم"، هي وجهة نظر نتحملها ونحمل تبعات خطئها إن صح، ولكننا لا نظن أن هذا الخطأ سيصح يوما ما، ما دام في هذا البلد شعراء كـ "سلطان الغنامي"، يؤكدون دائما بنصوص عظيمة كهذا ما نذهب إليه بتلك الجملة!
حنّي علينا يا البلاد الحبيبه
يام الرخا والطيب والجود والخير
أغراب صرنا فيك وانتي غريبه
وش عذر الاغصان ان جفتها العصافير
عاشق ترابك منك يبغى نصيبه
كبير يحيا بك ولو حلمه صغير
***
مواطن:
متى نسكن!
أو إنه ما يواطنا
وطنّا اللي موطنّا!
عشان الفرق؟
طيب من على شانه!
صغير الجرح!
يبي يكبر
ويكبر.. لين ما نقدر
نلم اللي تناثر من أمانينا
وانا داري؟
***
وفي الشارع وجيه تمرّ
تشابه حزن هـ الحارة
وانا اتأمل وجيه الناس
يسلم نايف الأعرج
ويسألني عن البنك العقاري!
وانا داري؟
***
وفي فيّة جدار أم البنات الأرملة
نقعد.. ـ أنا واحمد -
يقول:
ان المؤجر جا يطالبهم بمتأخر
وهم حق الأكل ما فيش
تخيل مرمطة هالعيش!
وانا داري؟
***
على غفلة تجي نورة
تجرّ الصوت مذعورة:
يا ناس اسعاف!
سالم من شهر ما انشاف
عياله مالهم والي
وانا ضاقت بي احوالي
رهن عمره لذاك البنك
وذاق من العمار الضنك
من اللي ساجنٍ سالم
عليك الله يا ظالم
وانا داري؟
***
ويتفلسف عليّ حسين
من اللي فاز بالمليون؟
خليل الشبرمي قالوا
توقع وش يبي يبني؟
اظنّ بينهبل يا ابني
واقول: الناس ما يدرون
وانا داري!
***
يكلمني على الهاتف
عطا الله: في البلد تسليف؟
بارمّم بيتنا وابني
لبوي ليا رجع ملحق
واذا زادت معي حاجة
بجيب لسيف ثلاجة
وسيف.. يعوم باوجاعه
يبي يعرس بعد عامين
يمكن تسمح اوضاعه
يدّور بيت في الحارة
عشان امه.. وحارتنا:
بنصف الخلق مزحومه
حراج وكثروا الباعه
وانا داري!
***
وتتجمع علي اطفال
شارعنا.. بنات عيال:
شاعرنا يا ابو موال
وراك البارح تغني
لـ "ديما" والوطن سارح؟
سمعنا صوتك وقمنا
يابو دفتر ولا نمنا..
واقول: اللي يغني للوطن
دايم عصافيره..
وانا عصفور واخذوني
بطير جناحي.. لساني
بلادي يا عصافير
وغصون وشمس مكسورة
من اللي يرسم الصورة؟
سؤال ومن يبي يدري
يغنّي للوطن مثلي:
ترى الدفتر وطن شاعر
ترى الشاعر وطن منفي
يا حلم يذوب في صدري
من اللي بالوطن شاعر؟
ومن داري؟