يمرني طيفك

بلغة سهلة الوصول، ومعنى قادر على أن يطرح نفسه بوعي، يأتي فهد الذيابي كي يدون شعرا جميلا يمتع الذائقة

يمرني طيفك ليا هبت نسانيس البراد
قبل غروب الشمس يعني عصير ما هو بالعصر
وليا بدت ذكرت السنين اللي يسجلها المداد
على الدفاتر والفخر والمجد من حظ الحبر
بدت معاناة السنين اللي تغشاها السواد
وبدت معاناة العيون اللي تحد مثلك بشر
أصبر ولو جرحك خفيّف بس جرحك بازدياد
والصبر ما ينطاق لو أقول يا زين الصبر
تلعب بقلبي لعب سامي في فريق الاتحاد
ليا تلاعب بالدفاع وسحّب الصخرة "تكر"
وصارع الذكرى وأنا والقلب عشنا في جهاد
والحلم تحييه المشاعر كل ما حل الشعر
وأضحك على نفسي وأقول المشكلة كبوة جواد
وأحلم ولكن في النهاية حلم والناتج صفر
حلم تهببه الهبايب كل ما هب البراد
وأنا أنتظر والله يعين الليل ويعين الشعر