آخـر ذنـوبـي
مسفر.. شاعر نسج كلماته وصاغها بكل سلاسة وعذوبة، لينثرها بين أيدينا قصيدةً تحكي "معاناة المحب".. اختار لها مفرداتٍ سهلة ولم يبحث عن التعقيد وكان واضحا كما هي الشمس.
حسبـي على اللـي رماني بالهوى صوبك
حظـي الردي يوم حظي قربك صوبـي
اللي جذبنـي تجاهـك.. روعة أسلوبـك
ما كنت أصدق يصير أحلى من أسلوبـي
مخدوع أنا فيك.. ما ناظرت بعيوبـك
الله بلانـي.. وصرتـي أول عيوبـي
يا للأسف.. صرت أنا بالحب مكتوبـك
مكتوب أعيش بحياتي.. فيك مكتوبـي
صرت أتبعك مثل ظلك وأسلك دروبك
على طريقك غديت.. وتاهت دروبـي
ما نتفـق بالمحبـة.. يختلف ثوبـك
الفرق واضح.. كبير الفرق عن ثوبي
يكفي محبة.. أنا ما عدت محبوبـك
اليوم.. تبنا خلاص من الهوى توبـي
اليوم أنا في حياتك.. آخر ذنوبـك
وأنتي بعد في حياتي.. آخـر ذنوبـي