وآخرتا شو؟!

.. وكما تغنت فيروز بلبنان وطرب لها الملايين رغم الجرح الذي تغنيه، والحزن الذي يكسو ملامح السامعين، يأتي الشعر من "شربل بعيني" بنفس الجرح والحزن ولكنه أيضا يُطرب! وانتقاد الفضيلة المزيفة والسياسات المتكلفة والموت المؤدلج في لبنان بمسلميه ومسيحييه... كل ذلك محزن مبك، لكنه في شعر شربل مطرب مطرب مطرب!

(1)
.. وْآخْرِتْا شُو؟!
كَمْشِةْ عُمرْ مَرْقِتْ
وْبَعْدُو غْرَاب الْبَيْنْ
عَمْ يِنْفُض رْيَاشُو
بِبْلادْ ضَاعِتْ بَيْنْ
أَطْمَاعْ حَنَّا وْزَيْنْ
وِبْدَمّهَا اخْتَنْقِتْ!

(2)
.. وْآخْرِتْا شُو؟!
وْأَطْفَالْنَا الْـ مِنْ حَقُّن يْنَامُوا
وْيِحْلَمُوا بِالنُّورْ
سَيْهَرُوا الدَّيْجُورْ
مِنْ كِتِرْ مَا انْضَامُوا
بِبْلادْ كلاَّ جُورْ
وْعَمْ تِرْتِمِي بِبْحُورْ
كذْب وْأَنَانِيِّه
وْصَفْقَاتْ مَالِيِّه
وْإِحْتِيَال وْزُورْ!!

(3)
.. وْآخْرِتْا شُو؟!
وْمَا ضَلّْ عِنَّا بَيْتْ
وَاقِفْ بِوِجّ الرِّيحْ
يِنْدَه عَلَى السِّكَّيْتْ:
يا رَيتْ رَسْمُوا زِيحْ
بَين الْكذبْ وِالْحَقّْ
ما كانْ ضَوِّي شْحِيحْ
وْلا كانْ حَيْطِي انْشَقّْ
" يا بَيْتنا الْمَشْلُوحْ عَ الطُّرْقَاتْ
وِتْشَرّدُوا حْبَابَكْ
وْعَ عَتْبِة بْوَابَكْ
حُبّ الْفَضِيلِه مَاتْ
وِانْطَمّ بِتْرَابَكْ
لَسْبِدّْ ما تِتْرَاجَع الأَيَّامْ
عَن ظُلمها الْمَقْصُودْ
وْتِتْغَيَّرْ بْإِسْم الشَّعبْ حُكَّامْ
قِرْفَان مِنْهَا الدُّودْ"..

(4)

.. وْآخْرِتْا شُو؟!
سَاعَه بْيِرْضَى فْلانْ
وْسَاعَاتْ بِيهاجِمْ
وْعَمْ يِحْترقْ لُبْنانْ
وْتِتْطَايَر جْمَاجِمْ
مُشْ عَارْفِينْ لْمِينْ؟!!
" جِيرانْ عاشُوا الْعُمرْ
عَ طُولْ مِتِّحْدِينْ
ما بْيِسْأَلُوا عَنْ دِينْ
دِينُنْ إِيمان وْفَخرْ
بِالأَرْز وِبْصِنِّينْ
لَكِنْ بِسَاعِةْ قَهْرْ
مِشْيُوا بْطَرِيقْ الْغَدْرْ
مَعْ زُمْرِة شْيَاطِينْ"

(5)

.. وْآخْرِتْا شُو؟!
الأيَّامْ تَرْكِتْنَا
بْبَحْر الْخَطِيِّه نْعُومْ
وْنِسْيِتْ عَ وِجَّا رْسُومْ
مِنْ وَهجْ ضِحْكِتْنَا
مِنْ لَوْن أَحْلَى غْيُومْ
مَرْقِتْ عَ تَلِّتْنَا
" افْتَكْرِتْ سْيُول الْحقْدْ
مْنِ زْمَانْ جَرْفِتْنَا
وْجَرْفِت حْرُوف الْمَجْدْ
مِنْ فَوْق صَفْحِتْنَا!!"

(6)

.. وْآخْرِتْا شُو؟!
وْبَعِدْنَا بْلُبْنَانْ
مْنِنْحِنِي لِفْلانْ
وْمِنْأَلِّه فْلَيْتَانْ
وِنْدُورْ بِمْدَارُو
الإِنْسَانْ اَلله أَوْجَدُو إِنْسَانْ
تَا يِرْفَع شْعَارُو
وِيْمَجّدُو هُوِّي
وَحْدُو إِلَه الْحُبّ وِالْقُوِّه
الْـ مِنْ نَفْخِتُو بْيِلْوِي
أَكْبَرْ زَعِيمْ.. وْمِنْ هَوَا غْبَارُو
بْيِتْطَايَرُوا نْفَارِيتْ.. أَنْصَارُو

(7)

.. وْآخْرِتْا شُو؟!
ما عَادْ فِينَا دَمّْ
عَ كِتِرْ ما تْعِبْنَا
وْزَادِتْ مَصَايِبْنَا
ضِعْنَا بْزَاوَايَا الْعَتْمْ
لا الشَّمْسْ بَعْدَا شَمْسْ
وْلا نُورْهَا بْيِلْمَعْ
حَتَّى غْنَانِي الأَمْسْ
بِالْكَادْ نِتْسَمَّعْ
صِرْنَا عْذَاب النَّفْسْ
وْصِرْنَا التّنْهِيدَاتْ
وْلَوْلا مَرَقْ شِي عرْسْ
مِنْخَزِّق الزِّيناتْ

(8)

.. وْآخْرِتها شُو؟!
وْنِحْنَا اللِّي عَمْ نِخْسَرْ
هَـ الأَرْضْ وِالأَحْبَابْ
اللِّي تْحَوّلُوا لِتْرَابْ
كِرْمَالْ يِتْمَخْطَرْ
فَوْقُو الزَّعِيمْ السَّافِل النّصَّابْ
يَللِّي بْتِمُّو نْيَابْ
بِتْقَرْقِط الْخَنْجَرْ

(9)

يَا رَيْت فِيِّي خَلِّص بْلادِي
مِنْ كِلّ آلامَا
وْتِدْجِيلْ حُكَّامَا
وْتبْوِيسْ الأْيَادِي
وْيَا رَيتْ فِيِّي إِشترِي بْدَمِّي
أَمْن الشَّعبْ كِلُّو
وْبَدْل "الْعَشِيرِه" يْقَدِّس "الأُمِّه"
وِيْوَحِّد الْكِلْمِه
وْما يْعُود يِقْدِرْ جَيْش يِحْتَلُّو

(10)

.. وْآخْرِتْها شُو؟!
قْرِفْنَا الْحَكِي يَا ناسْ
قْرِفْنا الشِّربْ وِالْكاسْ
قْرِفْنا الْمَحَبِّه وِالزَّهرْ
قْرِفْنَا نْأَدِّنْ بِالْفَجْرْ
أَوْ نِحْضَر الْقدَّاسْ
قْرِفْنَا نْكَمِّلْ هَـ الْعُمرْ
الْخَالِي مْنِ الإِحْسَاسْ