سلطان الحب

للغرام سلاطينه، وياسر الزهراني أحدهم، عشقه مكلل بتاج من وله ومحبة قد يندر أن تتكرر من أحدهم إلى محبوبته، والغزل لقارئ هذه الأيام مطلوبٌ مطلوبُ مطلوب!

مادام حبك داخل القلب مزروع
مالك ومال الناس خلّك معايه
صرت اعشقك والعشق واقع ومشروع
اصبحت لي يا زين الاوصاف غاية
تعال واشعل في سما حبي شموع
تضوي متاهاتي وتضوي سمايه
تعال ليش الخوف ليش انت مفزوع
انا المعذب وانت بلسم دوايه
تعال حبي لك مدى الدهر مدفوع
وبأكتبه لك بعد موتي وصايه
معاي عيش العمر مرهف ودلّوع
خذ كل وجداني وكامل دفايه
وتهيم في موطن من الورد مصنوع
واهتم بك واعطيك كل العناية
واشيل عنك الهمّ والغمّ والجوع
واعلمك فنّ الشعر والرماية
وتصير عن كل المتاعيس مرفوع
واسكّنك بالحب داخل حشايه
وتحت رجلك تلمح الماس مرصوع
يجذب أحاسيسك تظنه مراية
ويسيل عشقي لك على شكل ينبوع
وادلّعك وتقول: ياسر كفاااايه
واصير سلطانك ولي كامل الطوع
يحق لي مادام تمشي ورايه
وتصير لي تابع وانا اصير متبوع
تهني ربيعي واحضنك في شتايه
مدّيت يدّي لك وانا حيل موجوع
ما ودّي اشقى وانطعن في قفايه
هذي شروطي قبل ما نشتكي اللوع
شروط من يعرف فصول الحكايه
الشرط الاول عن هوى الغير مردوع
درب الخيانه كان سبّة شقايه
والثاني ان البعد يازين ممنوع
تبقى معي مادام همّك لقايه
هذي شروطي وانت لك منّي اسبوع
فكّر وقرر واعرف انك منايه
فكّر بكل ركودوبرود وخشوع
اسبوع يكفي كل من كان تايه
ما اريد بكره ترجع تقول مخدوع
والا تعاندني وتلقى جفايه
لأني عنيد ومنّي العطف منزوع
والعزّ وصفي والفخر لي كنايه
والعشق في قلبي مدى الدهر مطبوع
عشته طفل واجتاحني في صبايه
مولع بحب الزين والقلب مولوع
بأحلى الغرام ودون حبي ضمايه
ابدعت فيك الشعر والشعر مبدوع
ابداع من له بالقوافي دراية
صغت المذكر واصبح الشعر مسجوع
والمقصد انثى والشعر لي هواية
احب شمس تعاند الليل بسطوع
شمسٍ يزينها الغطا والعباية