استهلال
يقول الشاعر والأديب إبراهيم الوافي: "حين نحاصر دوخة الرقص، سنكتشف بسهولة أننا جميعا اشتركنا في صناعة الهواء، فلا أقل من أن نتنفسه مجددا على هيئة رؤى وقصائد"..
أبو خلوووووووووو.. عندي استفسار طال عمرك، حينما نحاصر "دوخة الرقص" هذي، تبينا نحاصرها بعجر والا مسدسات؟ والا بس نصارخ عليها ونقول لها المكان محاصر سلمي نفسك يا "دوخة الرقص"، وبلاش محاولات هرب لأنها ستفشل لا محالة! بعدين إيش تقصد بأننا جميعا اشتركنا؟ يا بو الشباب.. كل واحد يتكلم عن نفسه، أنا ما قطيت معكم وكانك مصمم رجعوا لي قطيتي، مابي أشترك معاكم يا أخي!
لك نخلة الخافق وتمرة عذوقه
الدم قهوة والشرايين فنجال
لك بنستي خصلات شعري وطوقه
الغره الشلال والميش والشال
هتون الشريف
كل اللي أقدر أقوله يا أخت هتون: حسبنا الله ونعم الوكيل، وش هالقلب اللي منبّت ومتمّر والشرايين فنجال، يعني ناقص بس شاهي ربيع وأذونك بيالات وتحلو الجلسه مع قلبك! وبعدين بنستك وخصلاتك والغرة، ليه الأخت بتسوي دعاية لصن صيلك؟ وبشويش يا الغرة اللحين، غرة مين يا أم غرة، اللي يسمعك يصدق، الله يخلي الاستشوار والجل والتمليس، والا كان نص بنات الساحة ما تحركوا من بيوتهن بسبب حوادث مؤسفة في غررهم!
شاعر وأغني على كيفي وباسي شديد
وابني لي 100 جدر واهدم لي 100 جدر
مبارك الخليفة
ما يستفاد من هذا البيت أن مبارك الخليفة شاعر، وفي الوقت نفسه مطرب، وفي الوقت نفسه مصارع قوي جدا يستعين بحليب السعودية، وبعد الظهر يشتغل في شركة مقاولات، ولو إنه الله يهديه كتبها "قدر" بدال "جدر" كان أضفنا له صفة مهارة الطبخ، بس ما الله كتب، تصدق يا مبارك إني طول هالسنين أفكرها جدار وهي طلعت جدر، شوف إزززااااي!
لا تلومني كم شفت ناس وتغربت
وكم دست باحساسي ديار وأراضي
عبد الله البكر
وش عنده "جونقر"؟ اللي يدوس بإحساسه ويحطم ديار وأراضي! كم "باور هورس" الأخ يشرب باليوم؟ بعدين إذا باحساسك حطمت ديار وأراضي، أجل لو تدوس بشي ثاني وش تحطم يا أبو تركي؟ أقول عبد الله انتبه تكفى لا يدخل باحساسك مسمار وأنت تمشي، ويتسبب في فقدانك لخاصية تحطيم المدن، وإحنا ترانا داخلين على مرحلة جدية ومحتاجين فزعتك فيها، كم أرض ودنا تشوف لها صرفة يا وحش!
لاجاك فسر بذرعانه وخمك بوس
خشمك وعينك وراسك بيتك وسوره
فيصل العداوني
بسم الله علينا هذا جاي يتهاوش مو يحب، حتى العين والسور والبيت والحاجب أجل أرفض المسافة! ترى اللي زي كذا يا فيصل تقدر تخليه يغسل السيارة بالراحة، ولا يبي له أي إقناع دامه يبوس السور والجدران، قل له دامك تحبني هالحب قم غسل السيارة وجب لنا بريالين خبز، بس فيه سؤال من جد محيرني؟ العين وشلون تنباس؟ وهل يتطلب الموضوع مهارات خاصة أم يستطيع الكائن البشري العادي أن يقوم بهذه العملية دون أن يكون بوزه ثلاثة أمتار؟