بالهنا والقافية

محمد الفهادي شاعر و كاتب ساخر من الدرجة الأولى.. شخصية رائعة تشرفت بالتعرف عليها بمحض الصدفة وعجز المسكين يجيب لي سوالف طاش ما طاش يبيني افهم وأحس واسأله ليه وأنا "عمك اصمخ" عجز لف ودار فتح وسكر بالموضوع ما فيه فايدة.. وفجأة جاك الفرج يا استاز بسطويسي.. قلت له شوف أنا من كل حلقات طاش الحلقة الوحيدة اللي تعجبني فعلا هي حلقة "الشيخ فؤاد" اللي قبل سنتين ويا للصدفة ويا لفرحة محمد الفهادي لأنه أحد الأشخاص الذين كتبوا هذه الحلقة الرائعة.. محمد ألف مبروك صرت مشهور والناس بتأشر عليك بالشارع وتقول هذا هو صديق فيصل الخالد واحتمال من فرحتها فيك تصفقك بالطمام والبيض يعني ناقصك تحط بجيوبك جرجير وتصير سلطة فواكهه معتبرة.

قول والله أنها إشاعه؟
اللي بلا منطق ولا وزن  يحكون
ناسٍ تحسب الناس مثل البضاعة
يا صاحبي لا تصدق اللي يقولون
علاقتـي وايـا أليسا أشاعه
عايض راشد
والله إشاعه.. عايض قول الحقيقة بذمتك إشاعه وألا أنت بس خايف على سمعتك وقاعد تقول إنها إشاعة؟ أرجوك يا بو راشد علمنا والله ما نقول لأحد لأني بصراحة من يوم ما شفت صورتك اللي جنب كنك مبنشر الله يهديك وأنا أقول هذا والله اللي عذب قلوب العذارى وخصوصا اللبنانيات يحبون تراهم الصور المنبشره.. والظاهر إني سمعت أليسا تقول في لقاء إيه هيديه الشاعر السعودي اللي اسموه عايزززز راشد بحبه أنا كتير كتير.. بعدين تصدق تراني أول مره اعرف إن الحكي لازم بعد يكون موزون مثل الشعر النبطي.. أكيد فيه بحور للحكي يعني ممكن تعطيني سالفة على المسحوب وارد عليك بسالفة على الطويل وألا أقولك باخلي حامد زيد يرد عليك لانه هو تخصص طويل يا صديق أليسا.

حتى هي ما هي فاهمة؟
ضــمــنــي دخــيــلــك لــمـنــي بــالأيـادي
بــاحــس نـبـضــك وانـتـشـي فـرح وسـرور
خــلـيــنــا نـخـطــي مـثـل طـفـليـن عادي
نـبـنـي بـشــاطـيـنـا "أمــل" حـولـه قـصور
أمل المرزوق
أمل كلامك صحيح مليون بالمية ما هو من الضروري الشاعرة تكتب شي له معنى أو مفهوم أهم شي تحط صورتها وخلي الجمهور يحل الفزورة يا شطورة... بعدين بصراحة تكرار لمني في الشطر الأول بعد ضمني أضافت الكثير والكثير للبيت والتركيبة هذه مو أي أحد يقدر عليها أبدا، وبعدين إذا ما ضمك ولمك بالأيادي بذمتك وش بيضمك فيه بخشمه، بعدين الأطفال عندكم في البحرين يتضمضمون؟ عندنا والله لو يشوفه أبوه ضام بنت عمه لزقه بالجدار، الأطفال عندنا إذا تهوروا سرقوا علكة بعض عندكم كشخة مرة! أما سالفة بتبنين أمل محاط بقصور فهذه حقيقة المتنبي يحمد ربه ألفين مرة انك ما كنتي موجودة أيامه ولا كان وقفتي سوقه.

جدول الضرب
ثلاثة اثلاث ثلاث وثلاثيني
مرت علي كنها ثلاث ليلات
مدري هي تعبت من الخطوات رجليني
مدري هي تعبت من الرجلين خطواتي

رشيد الدهام
أحبائي الطلبة بعد ما تعلمتوا جدول الضرب الخاص بالرقم 3 نبيكم تراجعونه زين لأن الأستاذ رشيد الدهام بيسمع لكم بكرة ويا ويله ويا سواد ليله اللي ما يحفظ.. ننتقل لسؤال الجمهور والي يعرف الجواب لا يجاوب ويخرب المسابقة كم مره ذكر الرقم 3 ومشتقاته في الشطر الأول؟ ومن المؤكد أن الخطوات تتعب من الرجلين والرجلين تتعب من الخطوات والناس للناس والكل بالله.. يا رشيد ذكرتني بمسرحية شاهد ما شافشي حاجة يوم يقول له الأستاذ المحامي اللي اسمه مش طايق بعضوه ده خليفة خلف خلاف المحامي.. نورت المحكمة يا بيه.

حولينا ولا علينا يا رب
من الصباح اعشق حديث العصافير
ومن السوالف ما اعشق إلا سكاتي
أمشط مسافة سجتي بالتفاكير
وانقش على صخر الندم ذكرياتي
عبد الله الراشد
بو عابد أنت تسولف مع العصافير كثير؟ والله أني خفت عليك وشلت همك يا رجل بسم الله عليك بسم لله عليك اللهم حولينا ولا علينا يارب.. طيب تفهم على العصافير بسهولة وإلا تحتاج تركز؟ لأني أشوف صورتك دائما شكلك مركز والحين فهمت ليه، طيب هل تتكلم لغتهم و إلا بس تفهم عليهم يعني اقصد من صغرك أنت كذا و إلا بس على كبر؟ تصدق عاد إن تمشيط المسافات أسهل بكثير من تمشيط شعر المرأة وما يطول أبدا يعني لا كوافير ولا بطيخ بوعابد حاول انك ما تعلم الناس بمواهبك هذه أخاف يا رجل تجيك عين وتصير ما تفهم على العصافير وتفهم على الكناري بس وعلى طاري الكناري كيف الحال؟