قريةٍ ماتت

تعال بالله سكّن هالجنون الجموح
لولا الرجا فيك كان اجتاحني من زمان
يجنح بي كثير واللهفة تزيده جنوح
ياصل حدود التمرد في القلم واللسان
يخط باسمي متونٍ ما عليها شروح
طلاسمٍ مالها معنى ولا ترجمان
يحرجني القاري المشدوه يبغي وضوح
وأصرفه : علمها في داخلي يا فلان
في داخلي قريةٍ ماتت منازل ودوح
تبكي بها الريح نوع ٍ من دموع الحزان
تطايحت من سما الحسرة عرايش ولوح
الله عقب الشموخ اشلون طعم الهوان
أطلال، يضفي عليها الليل صمت ونزوح
يقرا على سورها البالي نصوص البيان
يا ما على سورها البالي تهاوت طموح
بنيت على الحلم واثر الحلم ما فيه أمان
باكر يطل القمر يبغي حديث السطوح
ويش اعتذر له إلى شعشع جبينه وبان
أقول له خلك هنيا دقايق واروح
وإلا فاعزيه والدنيا ابتلا وامتحان؟
يا حالة العاجز اللي فيه دم ٍ لحوح
ينفيه عجزه وهو ثابت وجود وكيان
ياللي تخيرت لي وجه الغياب الكلوح
ما تدري إن الغياب أصله : جريمة جبان
أنا على ما أنت خابر دمعتين ٍ وروح
يلعب بها الفقد لعب الريح بالخيزران
يسقيني الليل من كذبه غبوق وصبوح
وليا آنطرّ الفجر بكرة ولاني ظمان
تعال وافداك قلبٍ صار كله جروح
لوّك تبي تجرحه ما عاد تلقى مكان
تعال .. والله لا شفت اسمك بعيني يلوح
لا خلع عليه انتمائى ويش تبغى كمان ؟