أبو نواس وأبو دلامة
سعيد العمودي في مطولة لا تملّ، كلها بدايات مشوّقة، وكلها نهايات سعيدة، قصيدة اختارت سعيد العمودي دوناً عن الشعراء، فقدمها كما يجب أن يقدم الشعر الجميل.
طاب ليلي وانت يا فكري تولّم
اعطني شعرٍ يشابهني فخامة
خصص الموضوع والا اقول عمم
والأدب لو قل ما قل احترامه
تونا نقرا ونسعى ونتعلم
نسرج خيول الامل طيب وشهامة
لو يهدا لوقت حيلي ما تكلم
ينتهي عمري ولا ترخص كرامة
صاحبي حلال حرام اللي تحرم
وانت عيبك تنتقد اهل الزعامة
قصة الحطاب والفاس المثلم
قبل يسدل ليلك الحالك ظلامه
يوم شاف الشمس في جوي تجهم
وش تشوف بعينها زرقا اليمامة
غير ناسٍ تزرع الموت المنظم
في بلاد السلم يرمون الحمامة
احفظ الايات عن شعر التهكم
بس لاتاتي على ذكر الامامه
لوصعدت المرتفع من دون سلم
ماشغلت الراي ما ثرت اهتمامه
البقا للصيت لومات المعظم
يندفن باقي على صدره وسامة
قلهم عن برج ايفل لو تحطم
ينتهي تاريخ وتقوم القيامة
لا ورب البيت والعاقل تفهم
تمضي الايام وتواصل نظامه
وانت عاد اضرب على كيفك وقسم
الهدف مشروع والنهج استقامة
قلت لك ماقلت لك في ما تقدم
وكل شخصٍ حر يرضيني كلامه
بس خل الريح لو ساعه تكرم
تطرد الهاجوس وتزيح الغمامة
باتذكر طلة البدر المتمم
زارني طيفه وداهمني هيامه
هيه ياللي في شعرراسك تلثم
في عيونك ركّز الرامي سهامه
حاكني طاح الحطب يالله تبسم
ياخي المشتاق تكفيه ابتسامة
مر عابر عاث في قلبي وبصّم
قال بكرى تخضع الايام هامه
قلت عطني قال هاك الصبرعلقم
وش عطيت القلب ياغاية مرامه
قلت لحظه لكن المجنون عزم
ياخلي القلب من وين السلامة
الله اكبر صرت في قلبي تحكم
كلما حنيت لك تكتب غرامه
من يرمم قلب من فعلك تهدم
من يلملم روح يقتلها انقسامه
من يرد الصوت لو صوت يتبّلم
ليت ذنبه بس تكفيه الملامة
جيت زاير تفرض وجودك تهجم
جيت تسقي شاعرك نخب الندامة
جيت ظالم لين ظنيتك تظلم
مثل ابونواس ولا ابو دلامة
راح مثل النوم في صمته تلثم
موكبه يشرح تعاليه ومقامه
ودعن مقفي وصلى الله وسلم
وانتهي حلمي على صوت الاقامة