لاتغلق الباب

سعد المسعودي يعاتب بشفافية عالية عبر قصيدة جميلة ومتماسكة وعذبة

هون على القلب مالك بالزعل داعي
وش قيمة الوقت لولا فرحة عيونك
أدري بالأوضاع وانته تعرف اوضاعي
لا لا يهين الزمان ولا يهينونك
لا تغلق الباب يرمي الريح لشراعي
في لج بحر ٍ يحول الموج من دونك
ما عاد يقدر يفيد الطب باوجاعي
كن المرض سلك خيط وضاع في كونك
لو مر يومين ماجا الصوت باسماعي
امن الوله ودي استنسخ تليفونك
يا أعذب الورد طبعك ناسب اطباعي
ما قلت لي كم بعيني ناس يسوونك
إيه أنت راس الطموح ومكسب الساعي
اللي مضى نصف عمره يعزف لحونك
قصيدة ٍ ما كتبها الوقت وابداعي
تغيب عني وتحضر يوم يطرونك
لو يبكي العمر لقيا ليلها ضاعي
سالت مداهيل جوف ٍ ما اخلف ظنونك
تآمر وتنهى عليّه وامرك يطاعي
ازعّل الناس لجل الناس يرضونك
يا كامل الحسن دوك الشوق ملتاعي
وانته بوصلك بطي تجرح على هونك
خذني على قد عقلي عطّر أسماعي
يكفي ليا قلت لي يا سعود وش لونك ؟

شعر: سعد المسعودي