بالهنا والعافية

استهلال
"سالخيييير" يعني "مرحبا" بالفرنسي، الإنسان سبحان الله مثل البني آدم إذا توفى يموت، يعني الحياة قصيرة وسعوا صدروكم والدعوة مزح بمزح، واللي بيزعل ترى بنعتبره "ثقيل دم"، ونخصم منه درجتين مشاركة ونطلب حضور ولي أمره، وعلى طاري ولي أمره قرأت خبرا في وكالة أنباء الشعر العربي يقول: "أقام الشاعر الإماراتي راشد شرار أمسية شعرية عامرة في بيته في الشارقة"، وأنا أقول الظاهر الدعوة قلبت "من منازلهم"، والله يستر لا ندخل في فصل "لم ينجح أحد"، عموما من اليوم ورايح كل ليلة باسوي لي أمسية في بيتنا، وباجمع عيال الحارة وبانشر خبر: أقام الشاعر الفذ فيصل الخالد أمسية في بيتهم تخللها حضور عدد كبير من عيال حارتهم الذين طلبوا تغيير مطعم الطلبات لأن الحمص "مب شي"!

- سمياكيكم وسمياكينا

صح هذا انتي وهذا عطرك السمياكي
وهذي بوهة وجهك اللي بالضحا محموسة
وليت نقطة نقطة نقطة نقطة نقطة نقطة
مابي أغلط فالزمن والعالم المنفوسة
سعد علوش

سمياكي ومحموسة - وش دعوة - وجهها بصله!، طيب أعرب "سمياكي"! طيب يقدر سمياكيكم يسميك سمياكينا مثل ما سمياكينا سميك سمياكيكم؟.
أما الشطر الثاني - من جد- خلاني أشعر إنها نملة تمشي تمشي تمشي تمشي تمشي تمشي بعدين "تكرفست" وطاحت!

- شاعر الورشة

البدي والهيكل اللي ما تبي غيره
اسطب واستبنتين وقير علاقي
مدغم أبو شيبة

أي واحد يقرا البيت يعتقد إن الأخ مدغم قاعد يمدح تكسي أصفر موديل 72، ولكنه كان يمدح حبيبته اللي ما هي من قوم "أبو دقة وتسكيرة"، الأخ شاعر في أي ورشة؟ طيب الأخ متولع بشاحنة؟ لا ومن وسع الوجه منزلها بديوان صوتي بعد؟ طيب متى ناوي الشاعر مدغم أبو شيبة يفصح عن اسمه الصريح؟ والا اقول لك: دام "قير علاقي" خلك على المستعار ابرك!

- عذوبة نسائية

عذره يجيبه جاهز بكل الاحوال
يسوي من الددسن بكذبته تنكر
وين الهكر تكفى يراقب لي جوال
وتكفى ترى تكفى تهـز المهكّـر
رانيا ابراهيم

الله الله على العذوبة في الأقلام النسائية، أجل يحول لك الددسن تنكر؟ ده إنقليزي ده يا مرسي؟ تنكر مين يا حجة أم عباس، قال تنكر قال! بالله روقينا وركزي بس في تعديل نقابك ما دري ليه دايم معووج أحس شغالتكم ما تحط لك عليه نشا، وخلي الدداسن والتناكر واللاند كروزات لربعها، شوي شوي تكتبين لنا عن آخر رحله لك في القنص، أما قفلة القصيدة شي صراحة: "تكفى ترى تكفى تهز المهكر"! أجل الشاعر محمد الدحيمي يوم يقول "تكفى ترى تكفى تهز الرجاجيل" ماخذ الفكرة منك؟

- برجك اليوم

مباغتة عاصفة تمور باعماقك
بالقشرة الظاهرة.. تبدا لها صورة

هجاج الوسوس

أحس إن البيت هذا كاتبه معد لزاوية أبراج في جريدة يومية، "مباغتة عاصفة تمور بأعماقك" بسبب زميل العمل الذي سيحاول أن يوقع بينك وبين مديرك ولكن انتبه!! لا تسحب "الجلنط" وأنت نازل من سيارتك هذا اليوم، فاحتمالية تدحرجها قائمة حتى لو كان مسحوب!